الذباب المنزلى
الوصف العام :
ـ اجزاء الفم : لاعقه ، لها زوج من الاجنحة الامامية ، والجناحين الخلفيين تحوروا الي دبوسا اتزان ، بيساعدها علي الطيران.
1- دورة الحياة :
ـ مرحلة البيضة : المرحلة دي بتاخد من 8 ساعات ل20 ساعة علشان تفقس ، وده معناه ايه؟
ـ ده معناه انه مع حضرتك وقت قليل جدا من كونك هتكافح بيض لإنك هتكافح يرقات.
ـ السؤال هنا : فين بتوضع الحشرة الكاملة البيض ده ، وفين بيفقس ؟
ـ وضع البيض بيكون في روث البهائم ، وبيكون بنسبة كبيرة جدا علي تجمعات القمامة.
ـ طيب انا استفدت ايه لما عرفت انها بتوضع البيض وبيفقس في الاماكن دي ؟
ـ استفدت اني لما اجي اكافح هبص اول حاجة علي المصادر دي ، ويكون في اعتباري اني اشتغل عليها في الاول ، وميغرنيش تواجد الحشرات الكاملة فين ، اكثر ما ابقى مهتم من فين بتفقس وتكبر وتفضل مسببالي مشكلة.
2ـ مرحلة اليرقة : ودي فيها 3 اعمار يرقية : يعني بعد ما بتفقس بتنسلخ تلات انسلاخات: طور يرقي اول ، طور يرقي ثاني ، طور يرقي ثالث.
الطور اليرقي الاول : وده بياخد وقت من 20 ساعة الي 4 ايام ، ودة انسب طور لو هتكافح الاطوار اليرقية وده اصلا اساس المكافحة في الذباب المنزلي انك تكافح البيض واليرقات ، قبل ما تتعذر وتوصل معاك للحشرة الكاملة وتسبب مشكلة وتعيد التكاثر كمان.
الطور اليرقي الثاني : وده بياخد وقت من 24 ساعة الي 7 ايام ، هنا اليرقة بتكون كبرة في الحجم وبتظهر اغلب ملامحها.
الطور اليرقي الثالث : ودة بياخد وقت من 3-9 ايام .
ـ وبكدة عندك طول مرحلة اليرقات متوسط (2+ 4+ 5) = 11 يوم.
ـ وعلشان في بيئة توالد الذباب المنزلي (الروث، القمامة) هتلاقي فيها اكثر من طور يرقي فلازم تكافح علي الاقل كل 8 ايام ، ده لو هتكافح يرقات وبيض.
3- مرحلة العذرى: ودي تقريبا بتاخد 5 ايام.
وبكدة بقا معانا بالضبط (11+5)= 16 يوم ، علشان ذبابة واحدة مكافحتهاش كويس تتضاعف الي اكتر من 100 حشرة كاملة خلال 16 يوم بس.
ـ علشان كدة الاهمال في والتقصير في برنامج مكافحة الذباب حساس جدا بالذات في الصيف ، لأن في الصيف درجة الحرارة العالية بتعمل علي سرعة الفقس وتطور الاعمار اليرقية وخروج العذارى الي حشرات كاملة.
4- مرحلة الحشرة الكاملة : ودي تقريبا بتاخد بضعة اسابيع يعني من 3-9 اسابيع.
خلالهم انت مطالب انك تشتغل علي برنامج مكافحة للحشرة الكاملة ، وكمان للبيض واليرقات.
خلينا ندخل علي برنامج مكافحة الذباب المنزلى :
اول حاجة : قبل ما تمسك رشاشة ولا تعالى رش رش رش ، و المبيد الناهي والمبيد الفضائي ، والكلام ده ، خليك فاهم واشتغل صح.
عندي في حاجة اسمها : التدابير البيئية ، يعني ايه التدابير البيئية؟
ـ يعني اني ادور علي بيئات التوالد اشوف الموقع عندي ايه مشاكلة من ناحية بيئات التوالد ، عندي مقالب قمامة مكشوفة ومتبهدله علي الارض وقدام مداخل المباني او علي المداخل الخلفية ؟
ـ هل لو انا في مزرعة انتاج داجني او مزرعة انتاج حيواني ، في روث ؟
ـ دول الحاجتين اللي الذباب بيبيض عليهم وهم اساس المشكلة.
ـ طيب اعمل ايه ؟ اقولك تعمل ايه كشخص متخصص وليك مكان في الشركة وعليك مسئوليات.
ـ اول حاجة تطالب الادارة لو في مقالب قمامة تتشال وتتنقل بعيد ولو مزرعة كبيرة ف انت قدامك كذا حل منها مثلا : التغطية والنقل ، منها الحرق ، منها الدفن، طبعا طرق التخلص من القمامة فيها تفصيل مش موضوعنا هنا.
ـ طيب انا بقول ومش بيتنفذ ؟ يبقى تعرف الادارة باللي هيحصل مستقبلا ، وانك هتكلفهم بعد كدة مبيدات مكافحة ، يعني بدل تدابير بيئية مش هتكلف حاجة ، هتبقى مكافحة كيميائية هتكلف مبالغ محترمة؟ لية ؟؟؟ لان القمامة رشيتها النهاردة ، تاني يوم كميات تاني من فوق.
ـ تاني يوم كميات تاني وهكذا ، وكمان رش المبيد ممكن ميوصلش في الاكوام للاخر ويقضي علي الاطوار كلها ، فتفضل عندك نفس المشكلة ، يبقى الافضل التدابير البيئية.
ـ الحاجة التانية خلاص كدة مفيش حاجة بتترفع وبيتأخروا كل يوم والمفروض رفع اكوام القمامة كل يوم ، خلاص نتعامل رش كيميائي.
هتستعمل في رش مبيدات اليرقات علي اكوام القمامة وعلي الروث ، كل يوم.
ـ الرش لازم يغطي علي الاقل من 25-30 سم.
ـ اسماء المبيدات : كل مكان في مبيدات مشهورة بتستخدم فيها ، بس التوصيات العامة :
ـ انك لازم كل فترة تغير المجاميع الكيميائية ، علشان صفة المقاومة عالية جدا في الذباب المنزلي ، يعني ايه صفة مقاومة ؟؟
ـ صفة مقاومة : يعني لو بترش 7مل/ لتر وبيجيب معاك نتيجة كويسة ، بعد 3 شهور يعني 6 جيال تقريبا يبدأ التركيز ده ميجبش معاك نتيجة وبالتالي ترفع التركيز وتكلف فلوس اكتر ، وكمان مش هيعمل نتيجة ويبقى السلالات الموجودة عندك في الموقع مقاومة للمبيد اللي بتستخدمة .
ـ طيب غيرت المجاميع الكيمائية ، ايه تاني توصيات ؟
ـ لازم تلتزم بالتركيز المدون او الموصى بيه علشان صفة المقاومة، ولازم تلتزم بتوقيت الرش اللي هو بعيد عن الحرارة العالية ، علشان المبيد ميتكسرش وفي الاغلب في الصبح.
نيجي بقا لمكافحة الحشرات الكاملة : واخر حاجة هنبصلها هنا المكافحة الكيميائية.
ـ في الاول نشتغل على المكافحة الوقائية والميكانيكية .
الاسلاك علي النوافذ ، والمحافظة علي الابواب مغلقة ، والستائر الهوائية ، والشفاطات في المطابخ، واستخدام المصائد اللاصقة ، واستخدام الصواعق بأنواعها.
ـ نتطرق للمكافحة الكيميائية : بالنسبة للمبيدات متفقين انها بتختلف من وقت لاخر ومن مكان لمكان ، وعرفنا التوصيات عموما.
ـ بس هنقول فيها الالتزام بتركيز الرش الموصى بيه اهم حاجة.
إرسال تعليق